Tërmeti 8.8 ballë në Rusi! Donald Trump jep alarmin: SHBA të përgatitet, mund të përballet me cunami

Evakuimet janë duke u zhvilluar në Japoni, Hawaii dhe disa pjesë të Bregut Perëndimor të SHBA-së, pasi një tërmet me magnitudë 8.8 ballë pranë Gadishullit Kamchatka në lindje të largët të Rusisë ka shkaktuar paralajmërime për cunami në të gjithë Oqeanin Paqësor.

Rajoni Sakhalin i Rusisë ka shpallur gjendje të jashtëzakonshme në Ishujt Kuril veriorë, e njëjta pjesë e vendit ku është shfaqur një video e valëve të cunamit që përmbytin një qytet port.

Kryebashkiaku Alexander Ovsyannikov tha se "të gjithë" në zonë ishin evakuuar. "Kishte kohë të mjaftueshme, një orë të tërë. Pra, të gjithë u evakuuan, të gjithë njerëzit janë në zonën e sigurisë nga cunami", tha ai, raportoi AFP.

Valë cunami deri në 3-4 metra janë raportuar në Kamchatka, ndërsa valë 30 cm kanë goditur një qytet në Hokkaido, në veri të Japonisë.

Guvernatori i Havait, Josh Green, u ka kërkuar njerëzve të ndjekin urdhrat e evakuimit dhe të qëndrojnë të qetë, ndërsa Presidenti i SHBA-së, Donald Trump, i këshilloi amerikanët të jenë në gatishmëri për paralajmërimet për cunami. Disa persona janë plagosur në Kamchatka për shkak të tërmetit dhe priten lëkundje të forta pasuese, raporton agjencia e lajmeve TASS.

Alarme për cunami me nivele të ndryshme janë lëshuar gjithashtu në pjesë të Kinës, Filipineve, Indonezisë, Guamit, Perusë dhe Ishujve Galapagos pranë Ekuadorit.

“KORÇA BOOM”