Urime Kozeta Milikut për këtë arritje të jashtëzakonshme, një krenari për Korçën dhe për gjithë Shqipërinë

Një tjetër histori suksesi vjen nga Korça. Kozeta Miliku është përzgjedhur nga “The Globe and Mail”, gazeta më prestigjioze e Kanadasë, mes studiuesve të rinj më të spikatur të vendit, falë kontributit të saj në kërkimet shkencore mbi shëndetin e fëmijëve.

Rrugëtimi i saj nisi në auditorët e mjekësisë në Shqipëri, ndërsa sot ajo është pedagoge në Universitetin e Torontos, një prej institucioneve më të njohura akademike në botë. Me punën dhe përkushtimin e saj, Kozeta po udhëheq studime që synojnë të japin përgjigje mbi mënyrën se si ushqyerja dhe faktorët e hershëm të jetës ndikojnë në zhvillimin e obezitetit dhe sëmundjeve kronike tek fëmijët.

Kërkimet e saj pritet të kenë një ndikim të rëndësishëm në përmirësimin e shëndetit të brezave të ardhshëm, duke ofruar njohuri të reja për parandalimin e sëmundjeve që në moshë të hershme.

Vlerësimi nga “The Globe and Mail” është një dëshmi e nivelit të lartë të punës së saj shkencore dhe një arritje që bën krenare jo vetëm Korçën, por edhe mbarë Shqipërinë.

Historia e Kozeta Milikut është një shembull frymëzues se si talenti, puna e palodhur dhe përkushtimi mund të çojnë drejt suksesit në institucionet më prestigjioze të botës, duke e bërë emrin e Korçës të njihet dhe të vlerësohet në arenën ndërkombëtare.

“KORÇA BOOM”