Vihet në pranga një shtetas që posedonte dy armë zjarri

Finalizohet operacioni i koduar "Kolaneci", për goditjen e një rasti të armëmbajtjes pa leje.

Vihet në pranga një shtetas që posedonte dy armë zjarri (kallashnikov dhe pushkë).

Sekuestrohen dy armët e zjarrit.

Shërbimet e Komisariatit të Policisë Maliq, në vijim të punës për parandalimin dhe goditjen e veprimtarisë kriminale të armëmbajtjes pa leje, bazuar edhe në informacionet e siguruara në rrugë operative, se një shtetas mbante armë zjarri në banesë, kanë organizuar operacionin e koduar "Kolaneci".

Gjatë kontrollit në ambientet afër banesës së shtetasit J. D., shërbimet e Policisë gjetën një armë zjarri automatike dhe një armë zjarri pushkë, të cilat u sekuestruan në cilësinë e provës materiale.

Në përfundim të veprimeve procedurale, u arrestua në flagrancë shtetasi J. D., 64 vjeç, banues në fshatin Kolanec, për veprën penale "Mbajtja pa leje e armëve, armëve shpërthyese dhe municionit".

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

“KORÇA BOOM”