Vrasja e 55-vjeçarit nga e bija dhe i dashuri i saj, sot jepet masa për autorët – e përfshirë edhe nëna

Ditën e sotme pritet të zhvillohet seanca gjyqësore për caktimin e masës së sigurisë ndaj tre personave të akuzuar për vrasjen makabre të 55-vjeçarit Anesti Rama në Frashër të Fierit. Në bankën e të pandehurve do të jenë vajza e viktimës, i dashuri i saj dhe nëna – bashkëshortja e të ndjerit.

Ngjarja ka tronditur opinionin publik për shkak të brutalitetit dhe përfshirjes së gjithë familjes në krim. Sipas hetimeve, 26-vjeçarja e ka goditur babain fillimisht në organet gjenitale dhe më pas, me ndihmën e të dashurit Çlirim Dogani, e ka mbytur me tel. Nëna, ndërkohë, ka ndihmuar në fshehjen e gjurmëve dhe pastrimin e vendit të krimit.

Pas ngjarjes, përgjimet telefonike zbuluan komunikimet mes vajzës dhe Doganit, i cili dyshohet se kishte një lidhje intime me të. Ai është i martuar dhe baba i dy fëmijëve. Policia ka sekuestruar pamje filmike dhe prova të tjera materiale që pritet të paraqiten në gjykatë gjatë seancës së sotme.

Autoritetet vijojnë hetimet për të zbardhur në detaje motivet dhe rolin e secilit prej të përfshirëve në këtë vrasje brutale familjare.

“KORÇA BOOM”