Çfarë ndodhi në ditët e fundit të Maradonës? Dëshmitë sjellin zbulime të forta

Detaje të reja dhe mjaft prekëse kanë dalë në dritë gjatë procesit gjyqësor për vdekjen e Diego Maradonës, ku shtatë anëtarë të ekipit të tij mjekësor akuzohen për neglizhencë në kujdesin ndaj legjendës së futbollit argjentinas.

Në qendër të seancave të fundit ishte dëshmia e fizioterapistit dhe masazhatorit Nicolás Taffarel, i cili përshkroi gjendjen e rënduar fizike dhe emocionale të Maradonës në ditët e fundit të jetës së tij.

Sipas Taffarelit, Maradona kishte humbur interesin për jetën e përditshme, nuk ngrihej nga shtrati, refuzonte të ushqehej dhe nuk pranonte as kujdesin bazë personal. Ai deklaroi se kishte paralajmëruar ekipin mjekësor për përkeqësimin e gjendjes së ish-futbollistit dhe kishte kërkuar monitorim më të afërt, por sipas tij nuk pati reagimin e duhur.

Gjatë seancës u paraqit edhe një mesazh audio që, sipas prokurorisë, mbështet pretendimet se fizioterapisti kishte ngritur shqetësime serioze për gjendjen shëndetësore të Maradonës.

Një nga momentet më emocionuese të dëshmisë ishte rrëfimi për takimin e fundit mes tyre, më 24 nëntor 2020, vetëm një ditë para se Maradona të ndërronte jetë. Taffarel tregoi se i kishte propozuar të pinin së bashku një "mate", por legjenda e futbollit kishte refuzuar me fjalët: "Nuk dua asgjë, Taffita, mjafton". Kur u pyet se çfarë nënkuptonte, Maradona ishte përgjigjur shkurt: "Asgjë... mjafton. Kaq është."

Ndërkohë, prokuroria vijon të hetojë nëse vdekja e Maradonës ishte rezultat i gjendjes së tij shëndetësore apo i mangësive në trajtimin mjekësor. Ekspertizat mjekoligjore kanë ngritur dyshime se ai mund të ketë qëndruar për disa orë në gjendje kritike pa marrë ndihmën e nevojshme.

Shtatë të pandehurit kanë mohuar akuzat dhe kanë mbrojtur mënyrën e trajtimit të Maradonës, ndërsa procesi gjyqësor pritet të vijojë me dëshmi të tjera që mund të hedhin më shumë dritë mbi rrethanat e vdekjes së një prej ikonave më të mëdha të futbollit botëror.

“KORÇA BOOM”