420 tonë misër i infektuar me aflatoksinë, fermerët shqiptarë të pambrojtur nga importet

Misri me aflatoksinë, që vë në rrezik shëndetin e kafshëve dhe të njeriut, nuk prodhohet nga fermat shqiptare, por është importuar nga fermerë serbë.

AKU, në pikën kufitare të Hanit të Hotit, ka bllokuar 15 kamionë me misër, me peshë totale rreth 420 tonë, të dyshuar për përmbajtje aflatoksine.

Inspektorët e Ushqimit po zbatojnë urdhrin e ministrit Andis Salla, i cili kërkon analizimin e çdo ngarkese me misër. Sipas burimeve, mostrat nuk janë dërguar vetëm në ISUV, por edhe në laboratorët e akredituar në Belgjikë dhe Itali, pasi këto laboratorë japin rezultatet më shpejt sesa ai shqiptar.

Aflatoksina konsiderohet një nga toksinat më të rrezikshme për shëndetin e njeriut. Nëse kafshët konsumojnë misër të kontaminuar, kjo toksinë kalon më pas në qumësht dhe nuk shpërbëhet nga asnjë proces përpunimi. Sipas OBSH-së, aflatoksina është një ndër substancat më kancerogjene të njohura.

Mykotoksinat në ushqimin blegtoral krijohen kur misri ruhet në kushte të papërshtatshme magazinimi; sipas rregullave, ai duhet të mbahet në ambiente të thata.

Ushqimi i kafshëve që importohet nga Serbia rezulton të jetë i kontaminuar me aflatoksinë, gjë e cila u konfirmua edhe nga rezultatet e para të analizave më 7 nëntor, kur AKU bllokoi ngarkesën e parë prej 25 tonësh misër serb.

E gjithë sasia prej 420 tonësh kishte si destinacion fermat blegtorale shqiptare. Fermerët vendas janë të detyruar të furnizojnë stalle me misër importi, pasi prodhimi vendas është drejt zhdukjes.

Fermerët e drithërave në Shqipëri janë më pak të subvencionuarit në rajon, çka i bën kostot e prodhimit më të larta në krahasim me fermerët serbë, të cilët sigurojnë çmim më të ulët dhe fitim më të lartë.

Kjo politikë e gabuar ekonomike ka detyruar fermerët shqiptarë të ushqezojnë lopët, delet dhe shpendët me produkte të rrezikshme, të importuara nga Serbia.

"KORCA BOOM"