46 vjeç, vetëm dy ditë pas deklaratës për mungesë gjumi: Misteri i v*dekjes së Dae Library

Një tragjedi tronditi komunitetin e YouTube-it në Korenë e Jugut, pasi një YouTuber i njohur, Dae Library, u gjet i vdekur në moshën 46-vjeçare. Lajmi u bë publik vetëm dy ditë pasi ai kishte deklaruar në një transmetim maratone se po përballej me mungesë gjumi.

Dae Library, emri i tij i vërtetë Na Dong-hyun, u gjet pa shenja jete në shtëpinë e tij në Seul të shtunën. Policia u nis në vendngjarje pas telefonatave të miqve të tij, të cilët u alarmuan kur ai nuk iu përgjigj takimeve të planifikuara. Autoritetet njoftuan se nuk janë gjetur shenja të ndonjë akti të paligjshëm apo shënim vetëvrasjeje, dhe po hetojnë mundësinë e një sëmundjeje të mëparshme si shkak i vdekjes.

Vetëm dy ditë para ngjarjes tragjike, Dae kishte rrëfyer për ndjekësit e tij se kishte fjetur vetëm për rreth tre orë për shkak të përgatitjeve intensive për Javën e Modës në Seul. Në transmetimin e drejtpërdrejtë që zgjati mbi pesë orë, ai foli me fansat e tij, luajti lojëra dhe ndau momente nga përditshmëria e tij, duke treguar pasionin dhe përkushtimin ndaj punës në platformën e tij.

Dae Library kishte një bazë të madhe ndjekësish, me më shumë se 1.4 milion persona në YouTube, dhe ishte aktiv në këtë platformë që nga viti 2010. Vdekja e tij e papritur ka lënë një boshllëk të madh tek komuniteti i fansave dhe kolegëve të tij, duke rikujtuar rreziqet e stresit dhe lodhjes ekstreme në botën e krijuesve online.

“KORÇA BOOM”