Abuzoi seksualisht me të miturën, përfitonte nga gjendja e saj, dënohet me 25 vite burg

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Fier, është dhënë vendimi përfundimtar në lidhje me një çështje të rëndë penale që lidhet me abuzimin ndaj një të miture.

Pas përfundimit të procesit gjyqësor, shtetasi Xh.V. u shpall fajtor dhe u dënua me 25 vjet burg për kryerjen e veprës penale “Marrëdhënie seksuale ose homoseksuale me të mitur”, të parashikuar nga neni 100 i Kodit Penal.

Procedimi penal nr.26, i regjistruar më 13 janar 2023, ka përfshirë hetime për disa vepra të rënda penale, përfshirë “Marrëdhënie seksuale ose homoseksuale me të mitur”, “Shfrytëzim prostitucioni” dhe “Mbajtje pa leje e armëve, armëve shpërthyese dhe e municionit”, të parashikuara nga nenet 100, 114 dhe 278/2 të Kodit Penal.

Nga hetimet e kryera, u provua se shtetasi Xh.V., duke përfituar nga situata e vështirë ekonomike e familjes së të miturës dhe nga njohjet personale me të, e ka ftuar atë në banesën e tij. Më pas, ka shfrytëzuar gjendjen e saj të pafavorizuar për të kryer marrëdhënie seksuale.

Autoritetet kanë theksuar rëndësinë e vijimit të hetimeve për vepra të kësaj natyre dhe nevojën për mbrojtjen e të miturve në çdo fazë të procesit penal dhe social.

“KORÇA BOOM”