Aksident fatal, 64-vjeçari bie nga lartësia dhe ndërron jetë

Një ngjarje e rëndë është regjistruar këtë të martë në zonën e Paskuqanit, në Tiranë, ku një punëtor ka humbur jetën gjatë kryerjes së punimeve.

Sipas njoftimit zyrtar të Policisë, rreth orës 10:30, në Paskuqan 1, gjatë punës, ka rënë nga lartësia shtetasi H. P., 64 vjeç, i punësuar për punime hidraulike. Si pasojë e plagëve të marra, 64-vjeçari ka ndërruar jetë në vendngjarje.

Menjëherë pas ngjarjes, policia dhe grupi hetimor kanë mbërritur në vendin e aksidentit për të sqaruar rrethanat dhe për të verifikuar kushtet e sigurisë në punë.

Në vijim të veprimeve hetimore, rreth orës 18:00, specialistët për Hetimin e Krimeve në Komisariatin e Policisë Nr. 5 kanë arrestuar në flagrancë shtetasin A. M., 61 vjeç, administrator i firmës nënkontraktore, i dyshuar për shkelje të rregullave të sigurisë në punë.

Materialet procedurale i janë referuar Prokurorisë për veprime të mëtejshme ligjore, ndërsa hetimet për zbardhjen e plotë të ngjarjes vijojnë.

"KORCA BOOM"