Josa dhe Daja, emrat pas lavdisë së një Skënderbeu të paharrueshëm

A ju kujtohet ajo kohë kur Skënderbeu nuk ishte thjesht një ekip futbolli, por një krenari kombëtare? Kur Korça jetonte me ndeshjet, kur stadiumi gumëzhinte dhe kur emri i Skënderbeut përmendej me respekt jo vetëm në Shqipëri, por edhe në Europë. Ishin vite kur bardhekuqtë u kthyen në simbol force, organizimi dhe ambicie, duke thyer barriera dhe duke shkruar historinë e tyre në kompeticionet ndërkombëtare.

Në këtë foto shfaqen dy nga figurat që ndërtuan themelet e asaj epoke të artë, dy arkitektë të suksesit në kohë të ndryshme: Mirel Josa dhe Ilir Daja. Trajnerë me filozofi të ndryshme, por me të njëjtin vizion – ta ngrinin Skënderbeun aty ku e meritonte. Me punë të palodhur, qetësi, disiplinë dhe besim te projekti, ata i dhanë klubit identitet, stabilitet dhe emër të madh në futbollin shqiptar.

Nën drejtimin e tyre, Skënderbeu u kthye në një skuadër që nuk trembej nga askush, një ekip që dinte të fitonte, por mbi të gjitha dinte të luante futboll. Fitoret në kampionat, titujt, paraqitjet dinjitoze në Europë dhe mbrëmjet magjike që bashkuan qytetin rreth skuadrës, janë kujtime që sot rikthehen me nostalgji dhe emocion.

Por kjo histori nuk ishte një rrugë njëkahëshe. Ashtu si dhe Daja i dhanë lavdi Skënderbeut, edhe Skënderbeu u dha shumë atyre: afirmim, respekt dhe një vend të veçantë në historinë e futbollit shqiptar. Nuk është rastësi që të dy e përmendin shpesh me krenari këtë periudhë, sepse ajo kohë nuk ishte vetëm sukses profesional, por edhe një lidhje shpirtërore me qytetin, tifozët dhe fanellën bardhekuqe.

Sot, kur ato vite duken më larg se kurrë, kujtimi i atij Skënderbeu mbetet i gjallë. Një kujtesë se çfarë ka qenë dhe çfarë mund të jetë sërish. Sepse disa histori nuk zbehen me kohën – ato jetojnë në zemrat e tifozëve dhe në faqet më të bukura të futbollit shqiptar.

"KORCA BOOM"