Makina përplas biçiklistin, humoristi përfundon në spital

Një aksident rrugor është regjistruar mbrëmjen e së dielës në sheshin “Demokracia” në qytetin e Shkodrës, ku një automjet ka përplasur një person që po lëvizte me biçikletë.

I lënduari është identifikuar si Nexho Shabani, humorist i njohur për publikun.

Pas përplasjes, ai është transportuar menjëherë në Spitalin Rajonal të Shkodrës, ku po merr mjekim të specializuar dhe ndodhet nën kujdesin e mjekëve.

Sipas njoftimit zyrtar të Policisë, rreth orës 20:05, automjeti me drejtues shtetasin N. Xh. është përplasur me shtetasin N. Sh., i cili po qarkullonte me biçikletë në zonën e sheshit. Si pasojë e aksidentit, çiklisti ka pësuar dëmtime trupore.

Policia po punon për sqarimin e plotë të rrethanave të ngjarjes, ndërsa drejtuesi i mjetit është shoqëruar për veprime të mëtejshme procedurale.

"KORCA BOOM"