Aksion i Policisë Kufitare në Korçë: Arrestim në Tushemisht dhe procedim për peshkim të paligjshëm

Drejtoria Vendore për Kufirin dhe Migracionin në Korçë ka intensifikuar kontrollet me qëllim parandalimin dhe goditjen e paligjshmërive në kufi.

Shërbimet e Policisë Kufitare në PKK Tushemisht, në hyrje të Republikës së Shqipërisë, ndaluan shtetasin I. G., 38 vjeç, banues në Vlorë. Gjatë verifikimit në sistem, ai rezultoi i shpallur në kërkim nga DVP Vlorë për veprën penale “Vjedhja”. Pas kryerjes së veprimeve procedurale nga Komisariati i Policisë Vlorë dhe konsultimit me Prokurorin, 38-vjeçari do të ndiqet në gjendje të lirë.

Ndërkohë, specialistët për Hetimin e Krimeve të DVKM Korçë referuan materialet në Prokurori, ku nisi procedimi penal për veprën penale “Peshkimi i ndaluar” ndaj shtetasit Y. J., 50 vjeç, banues në fshatin Udënisht, Pogradec. Ai u kap në bregun e liqenit, pranë fshatit Udënisht, me 22.35 kilogramë peshk të llojit Koran, që dyshohet se ishte peshkuar në Liqeni i Ohrit, në një periudhë kur peshkimi i këtij lloji është i ndaluar.

Po ashtu, shërbimet e DVKM Korçë kapën 13 migrantë të parregullt në afërsi të fshatrave Kapshticë (Devoll) dhe Dvoran (Korçë). Ata u trajtuan me urdhër largimi vullnetar nga territori i Republikës së Shqipërisë.

Materialet procedurale në të gjitha rastet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.

"KORCA BOOM"