Arrestohet në flagrancë 57-vjeçari që kontrabandoi mallra nga Greqia – Sekuestrohen cigare, pije alkoolike dhe celularë

Korçë – Shërbimet e Drejtorisë Vendore për Kufirin dhe Migracionin Korçë kanë finalizuar një tjetër rast të goditjes së kontrabandës, duke arrestuar në flagrancë një 57-vjeçar që transportonte mallra të dyshuara të kontrabanduara nga Greqia.

Gjatë kontrolleve të ushtruara në Pikën e Kalimit Kufitar Kapshticë, në hyrje të territorit të Republikës së Shqipërisë, policia kaloi për kontroll të imtësishëm në vijën e dytë një automjet me drejtues shtetasin Th. B., 57 vjeç, banues në fshatin Plasë, Korçë.

Nga kontrolli i ushtruar në automjet u gjetën dhe sekuestruan:

• Produkte ushqimore dhe pije alkoolike,

• Dhjetëra steka me cigare,

• Disa aparate celularë,

të cilat nuk ishin të shoqëruara me dokumentacionin përkatës, duke ngritur dyshime për kontrabandim nga shteti grek.

Në përfundim të veprimeve procedurale, shtetasi Th. B. u arrestua në flagrancë, për veprat penale:

• "Kontrabanda me mallra që paguhet akcizë",

• "Kontrabanda me mallra të tjerë".

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme hetimore.

 “KORÇA BOOM”