Banorët e pallatit në qendër të konfliktit: E kemi blerë banesën nga Gjon Shkambi, ndjehemi të kërcënuar pas v*rasjes së gjyqtarit

Banorët e pallatit që ndodhet në qendër të çështjes gjyqësore për të cilën u vra gjyqtari Astrit Kalaja, kanë folur për emisionin “Shqipëria Live”, duke sqaruar versionin e tyre dhe dokumentet që zotërojnë.

Pashko Pepniku dhe bashkëshortja e tij pohojnë se banesën e tyre e kanë blerë në vitin 1996 nga vetë Gjon Shkambi, gjyshi i autorit të vrasjes së gjyqtarit, Elvis Shkambi. Ata theksojnë se disponojnë një deklaratë noteriale të firmosur nga katër dëshmitarë, e cila është dorëzuar në gjykatë si provë.

“Në ’96 kam ardhur nga zona e Dukagjinit dhe kam blerë banesën nga Gjon Shkambi. E kam me dokument, me firmë dhe me katër dëshmitarë. Ai më vonë ka thënë që nuk është firma e tij dhe nuk e ka shitur, por dokumenti është dorëzuar në gjykatë dhe është njohur nga gjykata,” deklaron zonja Pepniku.

Çifti shprehet i shqetësuar dhe i kërcënuar pas ngjarjes së rëndë që ndodhi në ambientet e Gjykatës së Apelit, ku gjyqtari Astrit Kalaja u vra me armë zjarri nga Elvis Shkambi. Sipas tyre, kjo është pasojë e një çështjeje të zvarritur prej vitesh nga institucionet.

“Kam paguar 4 milionë lekë në dorë në vitin 1996. Nëse bashkia më strehon, e liroj shtëpinë që sot. Por kjo është prona ime dhe kam dokumente. Ndihem e kërcënuar, pasi një gjyqtar i ndershëm u vra për një pronë që ne e kemi me letra,” – shton zonja Pepniku.

Sipas Pashko Pepnikut, rreth 31 familje që banojnë në këtë objekt kanë letra pronësie të lëshuara nga Bashkia e Shkodrës që prej vitit 1992. Ai thotë se toka ishte pronë shtetërore dhe është regjistruar padrejtësisht në emër të fisit Shkambi në vitin 2008.

“Kemi 13 vite që jemi rrugëve të gjyqeve. Në 2006 toka rezultonte si pronë shtetërore, ndërsa në 2008 u regjistrua në emër të familjes Shkambi. Kemi vendime dhe dokumente të bashkisë të vitit 1992, me emër e mbiemër. Gjithçka është bërë me letra në ajër,” – u shpreh ai, duke kërkuar ndërhyrje nga institucionet dhe auditim të dosjes nga Kontrolli i Lartë i Shtetit.

Sipas deklarimeve të banorëve, konfliktet kanë nisur menjëherë pasi u dha një vendim gjykate që favorizonte familjen Pepniku. Ata thonë se pas këtij vendimi janë përballur me kërcënime të shumta nga pala tjetër.

“KORÇA BOOM”