Bashkëshorti dyshohet se e vr*u me th*kë, familjari rrëfen historinë e martesës së Esma Meços

Një ngjarje e rëndë ka tronditur komunitetin shqiptar në Greqi, ku 26 gushtin e kaluar humbi jetën në mënyrë tragjike Esma Meço, 53 vjeç. Sipas hetimeve paraprake, bashkëshorti i saj, Bujar Meço, dyshohet se e ka sulmuar me thikë pas një konflikti mes tyre.

Esma u dërgua me urgjencë në spitalin e Komotinit, por plagët e marra rezultuan fatale dhe ajo nuk mundi të mbijetonte. Pas ngjarjes, bashkëshorti i saj dyshohet se tentoi t’i jepte fund jetës. Ai u transportua në spital dhe po mbahet nën mbikëqyrjen e policisë.

Tragjedia u bë edhe më e rëndë për shkak se në banesë ndodheshin edhe dy fëmijët e çiftit, një vajzë 16-vjeçare dhe një djalë 19-vjeçar.

Sipas raportimeve, ishte vajza ajo që njoftoi autoritetet për ngjarjen. Ndërkohë, djali, i cili në momentin e konfliktit ishte në gjumë, u zgjua dhe, pasi pa nënën të plagosur, e mori atë për ta dërguar me urgjencë në spital, me shpresën se mund të shpëtonte.

Por pas kësaj tragjedie fshihet një histori e gjatë konfliktesh familjare.

Në një lidhje online me emisionin “Me Zemër të Hapur”, xhaxhai i Esma Meços ka rrëfyer se martesa e çiftit kishte pasur probleme prej vitesh.

Sipas tij, në vitin 2022 Esma kishte denoncuar bashkëshortin për kërcënime, ndërsa Bujari ishte arrestuar në atë kohë. Konfliktet mes tyre, sipas dëshmisë së familjarit, nuk kishin qenë një episod i izoluar.

Madje, pak kohë para ngjarjes së rëndë, Esma kishte marrë vendimin për t’i dhënë fund martesës dhe kishte planifikuar të vijonte procedurat e divorcit.

Xhaxhai i viktimës ka treguar edhe për bisedat që kishte zhvilluar me mbesën e tij dhe për mënyrën se si ajo e kishte përjetuar situatën familjare. Ai tha se Esma i kishte shprehur dëshirën që, nëse fëmijët do të vinin me të pas ndarjes, t’i merrte me vete.

Veçanërisht e rëndësishme për të ishte vajza e saj, për të cilën, sipas xhaxhait, Esma ishte shumë e lidhur.

Tashmë, hetimet pritet të zbardhin plotësisht dinamikën e ngjarjes së 26 gushtit, ndërsa familjarët dhe dy fëmijët përballen me pasojat e një tragjedie që, sipas dëshmive të bëra publike, erdhi pas vitesh konfliktesh dhe një martese që kishte qenë prej kohësh në krizë.

“KORÇA BOOM”