Berisha nuk jep një emër të preferuar për Tiranën, por zbulon tre përfaqësues të PD-së

Kreu i Partisë Demokratike, Sali Berisha, ka deklaruar se opozita ende nuk ka një emër zyrtar për të kandiduar në zgjedhjet e parakohshme për Bashkinë e Tiranës.

Berisha sqaroi se janë ngarkuar tre përfaqësues — Belind Këlliçi, Flamur Noka dhe Ilir Alimehmeti — për të negociuar me partitë e tjera opozitare lidhur me emrat e mundshëm të kandidatëve.

Në një deklaratë për mediat, kryedemokrati u shpreh se ai vetë nuk do të japë ndonjë opinion për ndonjë kandidat të mundshëm, pasi kjo do të ndikonte në procesin e përzgjedhjes. Sipas tij, gjithçka është pjesë e një procedure që kërkon dakordësi të gjerë mes forcave opozitare.

“Belind Këlliçi, Flamur Noka dhe Ilir Alimehmeti do të jenë përfaqësuesit tanë për negociatat me partitë e tjera opozitare. A më shkon mua që, nga njëra anë, t’i ngarkoj ata për të negociuar dhe nga ana tjetër të deklaroj emra të preferuar? Sot do të mblidhen, ndërsa punën e kanë nisur që dje. Këta tre janë të ngarkuar të negociojnë me të gjitha partitë opozitare, të takohen me përfaqësues e kandidatë dhe të arrijnë dakordësi për emrat. Pastaj do të vijë faza e vendimmarrjes për kandidatin. Nuk do të prononcohem, sepse ky është një proces. Nëse e bëj këtë, do të thotë se kam një të preferuar,” – tha Berisha.

Zgjedhjet e parakohshme për Bashkinë e Tiranës janë kthyer në një pikë qendrore të diskutimeve në kampin opozitar, ndërsa negociatat për një kandidat të përbashkët po vazhdojnë.

“KORÇA BOOM”