BSH: Tirana kryeson për huatë individuale/ Qarqet më pak huamarrëse mbeten Korça dhe Lezha

Sipas të dhënave të publikuara nga Banka e Shqipërisë, për këtë vit deri në fund të muajit gusht, Tirana mbetet qyteti me nivelin më të lartë të kredisë për individët, duke regjistruar 230 miliardë lekë kredi aktive, që përfaqëson mbi 67% të totalit të kredive në vend.

Megjithatë, rritja e huamarrjes në kryeqytet për këtë periudhë është relativisht e moderuar, me vetëm 6,1% krahasuar me tremujorin e mëparshëm.

Sipas BSH-së, pas Tiranës, në vend të dytë renditet Durrësi me 22 miliardë lekë kredi, shoqëruar nga një rritje prej 5,4%, ndërsa Vlora ndjek me 9,9 miliardë lekë dhe të njëjtën përqindje rritjeje.

Në Fier, shuma e kredive ka arritur 9,3 miliardë lekë me një rritje prej 5,2%, ndërsa Elbasani ka shënuar një rritje rekord në nivel kombëtar me 7,4%, duke arritur një total kredish prej 8,8 miliardë lekësh.

Tendenca e rritjes së huamarrjes në qarqet jashtë Tiranës ndjek të njëjtin model si në vitin 2023, ku Elbasani ishte gjithashtu në krye për ritmin e rritjes së kredisë nga një tremujor në tjetrin.

Nga ana tjetër, qarqet më pak huamarrëse mbeten Korça dhe Lezha, ku niveli i kredisë është më i ulët, gjë që lidhet edhe me numrin më të vogël të popullsisë në këto zona.

Raporti i BSH-së pasqyron jo vetëm shpërndarjen e huadhënies në nivel qarku, por edhe dinamikat e zhvillimit ekonomik lokal, kërkesën për financim dhe qasjen e individëve ndaj kreditimit bankar në zona të ndryshme të vendit. 

“KORÇA BOOM”