Devollinjtë tregojnë "muskujt": Optimistë dhe të vendosur për ngjitjen në Kategorinë e Parë

Pas një seance stërvitore intensive, disa nga futbollistët më me përvojë të ekipit të Devollit kanë zgjedhur ta mbyllin ditën me një foto simbolike, e shoqëruar me një mesazh domethënës. Në imazhin e publikuar në rrjete sociale shfaqen lojtarët Ferhati, Demiri, Ivani Beqiri, Kapllani dhe Pere – të cilët shpesh konsiderohen si “senatorët” e ekipit.

“Jemi më të fortët, mezi presim të na shikoni në garë”, shkruhet në diçiturën që shoqëron foton, duke dhënë një mesazh të qartë për motivimin dhe seriozitetin me të cilin po përgatiten për sezonin e ri.

Përtej tonit humoristik dhe miqësor të postimit, ajo që bie në sy është besimi dhe përkushtimi që ekipi ka për objektivin e tyre madhor – ngjitjen në Kategorinë e Parë. Kjo nuk është më vetëm një dëshirë, por një synim konkret, i mbështetur edhe nga përmirësimi i kushteve financiare dhe menaxheriale.

Kryetari i Bashkisë, Eduard Duro, së bashku me stafin drejtues dhe teknik, kanë ofruar një mbështetje të dukshme, që po kthehet në motivim shtesë për futbollistët. Ambienti brenda ekipit është pozitiv dhe puna e përditshme po zhvillohet me seriozitet, gjë që ndikon drejtpërdrejt në përgatitjen për sfidat që i presin.

Në këtë fazë të përgatitjeve, Devolli po jep sinjale të forta se nuk do të jetë një ekip për të plotësuar numrin, por një skuadër që do të luftojë për t’u rikthyer aty ku ndihen më shumë vetvetja – në Kategorinë e Parë të futbollit shqiptar.

“KORÇA BOOM”