Dhuna ndaj medias rikthehet: Gazetar sulmohet brutalisht në mes të rrugës

Një ngjarje e rëndë ka tronditur mbrëmjen e djeshme opinionin publik. Gazetari Elton Tozaj është dhunuar rreth orës 19:30 në autostradën Tiranë–Durrës, në rrethana që mbeten ende të paqarta dhe shqetësuese.

Sipas informacioneve të bëra publike nga familjarët e tij, Tozaj është sulmuar nga disa persona, të cilët ata pretendojnë se janë tashmë të identifikuar. Dhuna e ushtruar ndaj gazetarit ka qenë e rëndë, duke i shkaktuar dëmtime serioze fizike.

Familja bën me dije se Elton Tozaj ndodhet aktualisht në gjendje të rënduar shëndetësore dhe po merr trajtim intensiv mjekësor. Situata paraqitet delikate, pasi gazetari po lufton për të mos humbur shikimin, gjë që e bën edhe më alarmante këtë ngjarje.

Rasti ka ngjallur reagime të forta në opinionin publik dhe ka rikthyer në vëmendje shqetësimin për sigurinë e gazetarëve dhe ushtrimin e dhunës ndaj tyre. Familjarët janë shprehur thellësisht të tronditur dhe kërkojnë që autorët e kësaj ngjarjeje të rëndë të vihen sa më parë përpara drejtësisë.

Pavarësisht gjendjes së vështirë, familja e gazetarit shpreh shpresë se Elton Tozaj do ta kalojë këtë moment të vështirë dhe do të rikuperohet, për t’u rikthyer pranë jetës së tij të përditshme dhe profesionit që ushtron prej vitesh.

"KORCA BOOM"