Djali në krye të hetimit: Rihapet vdekja e Isak Andic pas rreth 10 muajsh

Isak Andic, njeriu që themeloi markën e njohur të modës “Mango” dhe i dha elegancës mesdhetare jehonë globale, ndërroi jetë dhjetë muaj më parë në një mal të Katalonjës. Fillimisht, vdekja e tij u raportua si një aksident tragjik: një 71-vjeçar që kishte humbur ekuilibrin gjatë një shëtitjeje në shtegun malor të Montserratit.

Por tani duket se hetimet kanë marrë një tjetër drejtim. Autoritetet spanjolle po shqyrtojnë mundësinë e një vrasjeje dhe në qendër të hetimit është vendosur emri i djalit të tij, Jonathan Andic.

Nga Stambolli në Katalonjë

I lindur në vitin 1953 në Stamboll, në një familje hebraike sefardike me origjinë nga Selaniku, Isak Andic u rrit mes aromës së pëlhurave dhe frymës së tregtisë. Në vitet ’60, familja e tij u zhvendos në Katalonjë, në kërkim të një fillimi të ri. Edhe pse në fillim nuk fliste mirë spanjisht, Andic kuptonte gjuhën universale të tregtisë, stilit dhe ambicies.

Ai nisi aktivitetin e tij duke shitur rroba në tregje lokale së bashku me vëllain dhe më vonë themeloi kompaninë “Mango”, e cila sot numëron qindra dyqane në dhjetëra vende të botës. Për dekada, ai ishte një nga figurat më të fuqishme të botës së modës në Spanjë dhe një prej njerëzve më të pasur në vend.

Hetimet e reja

Vdekja e tij u konsiderua një aksident i rëndomtë malor. Por sipas burimeve të ndryshme mediatike, policia ka rihapur çështjen pas disa dyshimeve që kanë dalë nga dëshmitë dhe rrethanat e vdekjes. Hetuesit kanë përqendruar vëmendjen te Jonathan, djali i tij, për shkak të deklaratave të paqarta dhe mospërputhjeve në raportimet fillestare.

Familja Andic ende nuk ka bërë një deklaratë publike të drejtpërdrejtë, por burime pranë tyre kanë thënë se ata po bashkëpunojnë me hetimet dhe besojnë në pafajësinë e djalit të Isakut.

Një trashëgimi e pasur, por e trazuar

Isak Andic la pas një perandori të madhe mode dhe një trashëgimi të fuqishme në industrinë globale të veshjeve. Vdekja e tij, tashmë e rrethuar me pikëpyetje, ka sjellë një hije mbi imazhin e një prej sipërmarrësve më të suksesshëm të dekadave të fundit.

“KORÇA BOOM”