“Drama në volejbollin shqiptar – rasti Nayara ndez debatet për barazinë gjinore

Federata Shqiptare e Volejbollit (FSHV) ka dalë me një reagim zyrtar lidhur me rastin e volejbollistes së ekipit të Dinamos, Nayara Ferreira, pas raportimeve në media se sportistja është pezulluar dhe se i është kërkuar t’i nënshtrohet një testi për përcaktimin e gjinisë.

Në deklaratën për mediat, FSHV thekson se nuk disponon asnjë informacion zyrtar që mund të bëhet publik lidhur me këtë situatë, duke nënvizuar se çështja po trajtohet me kujdes dhe diskrecion të plotë.

“Federata Shqiptare e Volejbollit sqaron se aktualisht nuk ka asnjë informacion zyrtar për çështjen e volejbollistes Nayara Ferreira që mund të komunikohet publikisht. FSHV po vepron me kujdes, duke respektuar parimet e fair play-it, barazisë në lojë dhe dinjitetit njerëzor”, thuhet në reagimin e federatës.

Institucioni shton se mbetet i angazhuar për të garantuar një proces të drejtë dhe transparent, në përputhje me rregulloret kombëtare dhe ndërkombëtare që rregullojnë veprimtarinë sportive të volejbollit.

Ky reagim vjen pas një vale diskutimesh në rrjetet sociale dhe mediave sportive, ku u përhap lajmi se volejbollistja braziliane e Dinamos, Nayara Ferreira, është pezulluar përkohësisht, ndërsa klubit i është kërkuar nga autoritetet sportive të kryejë një “test gjinie” për të verifikuar përputhshmërinë me rregulloret e garës.

Rasti ka ngjallur debat të gjerë publik, me shumë reagime në mbrojtje të sportistes dhe thirrje për respektimin e dinjitetit të saj njerëzor dhe profesional.

FSHV, nga ana e saj, ka bërë thirrje që çështja të trajtohet me kujdes dhe pa paragjykime, deri në përfundimin e çdo procedure zyrtare.

"KORCA BOOM"