Drejtori i IKMT Korçë, Edi Bitri: "Janë evidentuar rreth 370 subjekte që cënojnë sigurinë kombëtare në akset rrugore të qarkut!"

Pas urdhrit të Kryeinspektorit për largimin e strukturave të paligjshme në hapësirat publike përgjatë akseve rrugore, Inspektorati Kombëtar i Mbrojtjes së Territorit (IKMT) në Korçë, në bashkëpunim me Autoritetin Rrugor Shqiptar (ARRSH), ka ngritur grupet e punës për të monitoruar situatën në terren.

Sipas drejtorit rajonal të IKMT Korçë, Edi Bitri, deri më tani janë evidentuar rreth 370 subjekte që kanë zënë në mënyrë të paligjshme hapësira publike, duke përbërë rrezik për sigurinë rrugore dhe kombëtare. Këto subjekte përfshijnë kryesisht rrethime banesash, tabela karburantesh dhe biznese të lidhura me servise apo automjete të çmontuara.

Subjektet janë paralajmëruar të lirojnë hapësirat në mënyrë vullnetare deri më 31 korrik, sipas afateve të përcaktuara nga qeveria. Deri tani është vërejtur një nivel i shtuar ndërgjegjësimi nga qytetarët dhe bizneset për të respektuar ligjin.

Nga 1 gushti, ekipet e inspektimit kanë rifilluar kontrollin për të verifikuar nëse janë ndërmarrë veprimet përkatëse për çmontimin e strukturave. Në rastet kur nuk janë marrë masa, IKMT do të nisë penalizimet ligjore, që përfshijnë gjoba dhe ndërhyrje me forcë për prishjen e strukturave të paligjshme.

Drejtori i IKMT Korçë theksoi se deri më tani nuk janë vendosur masa administrative, pasi verifikimet janë ende në proces. Megjithatë, ai nënvizoi se mungesa e fuqisë punëtore ka shkaktuar disa vonesa në ndërhyrje.

Shpërndarja e subjekteve të evidentuara sipas akseve rrugore është si vijon:

• Aksi Korçë – Qafë Thanë: 239 subjekte

  • 122 rrethime banesash

  • 117 biznese

    
    

• Aksi Korçë – Kapshticë: 74 subjekte

  • 21 banesa

  • 53 biznese

    
    

• Aksi Korçë – Leskovik: 48 subjekte

  • 26 banesa

  • 22 biznese

    
    

• Aksi Libonik – Rëmbec – Plasë: 16 subjekte

  • 9 banesa

  • 7 biznese

    
    

IKMT do të vijojë me kontrolle intensive në ditët në vijim dhe apelon për bashkëpunim nga qytetarët dhe bizneset në respektim të ligjit dhe sigurisë rrugore.

“KORÇA BOOM”