Ekskluzive nga kampi bardhekuq: Dy emra të rinj në sulm, njëri shqiptar

Lajmi më i fundit që vjen nga kampi i Skënderbeut në lidhje me merkaton është mjaft premtues. Sipas burimeve të sigurta pranë klubit, drejtuesit janë pranë finalizimit të afrimit të dy futbollistëve të rinj, të cilët pritet të forcojnë repartin ofensiv të skuadrës.

Këto lëvizje vijnë edhe si pasojë e mundësisë për largimin e dy sulmuesve aktualë, Bismark dhe Nasr, të cilët duket se janë pranë një ndarjeje me klubin korçar. Për këtë arsye, stafi drejtues ka intensifikuar punën në merkato, duke synuar përforcimin e menjëhershëm të vijës së sulmit.

Sipas të njëjtave burime, bëhet fjalë për dy lojtarë cilësorë, me profil të lartë, të cilët aktualisht luajnë në kampionate europiane. Njëri prej tyre mendohet të jetë me origjinë shqiptare, ndërsa tjetri është i huaj, por me eksperiencë në nivele të mira konkurruese.

Emrat konkretë të lojtarëve nuk janë bërë ende publikë, por mësohet se identiteti i tyre mund të zbulohet pas disa ditësh, kur gjithçka të jetë zyrtarizuar.

“KORÇA BOOM”