FRONËZIMI I MITROPOLITIT TË RI TË KORÇËS, ANASTASIT

FRONËZIMI I MITROPOLITIT TË RI TË KORÇËS, ANASTASIT

Korçë, më 27 Shtator 2025

Plot gëzim shpirtëror dhe emocione u krye sot, në orën 11:00, fronëzimi i Hirësisë së Tij, Mitropolitit të Korçës, z. Anastas, në Katedralen e Ngjalljes së Krishtit në Korçë.

Shërbesa e Fronëzimit u zhvillua në praninë e Fortlumturisë së Tij, Kryepiskopit të Tiranës, Durrësit dhe të Gjithë Shqipërisë, Imzot Joanit, anëtarëve të Sinodit të Shenjtë të Kishës Orthodhokse Autoqefale të Shqipërisë, përfaqësuesve të autoriteteve lokale, klerikëve të shumtë nga mbarë vendi dhe një numri të madh besimtarësh, që e mbushën përplot kishën.

Hirësi Anastasi u zgjodh unanimisht Mitropolit i Korçës nga Sinodi i Shenjtë i Kishës Orthodhokse Autoqefale të Shqipërisë, në kryesimin e Fortlumturisë së Tij, Kryepiskopit Joan, më 16 shtator 2025. Deri në zgjedhjen e tij, Hirësia shërbente si Episkop i Krujës dhe, nga 3 dhjetori i vitit të kaluar, si Protosingjel i Kryepiskopatës së Tiranës dhe Durrësit.

Në fjalën e tij të fronëzimit, Mitropoliti i ri shprehu mirënjohje dhe nderim të thellë ndaj Perëndisë, që e denjoi për marrjen e përgjegjësisë baritore të Mitropolisë së shenjtë të Korçës. "Sot ndodhem përpara Perëndisë dhe përpara jush me një ndjenjë të papërshkrueshme falënderimi dhe mirënjohjeje", theksoi ai, duke nënvizuar se "çdo fronëzim nuk është kurrë akt i thjeshtë njerëzor, por ngjarje e Kishës, një gur i ri i vendosur në tempullin e gjallë të Trupit të Krishtit".

Mitropoliti i ri iu referua gjerësisht trashëgimisë historike dhe shpirtërore të Korçës, duke theksuar se "Korça është quajtur shpesh 'qyteti i dritës dhe i kulturës'. Këtu u hapën shkolla, këtu u formuan breza të tërë intelektualësh, këtu u lidh kultura me besimin dhe arsimi me shpirtin". Ai deklaroi: "Nuk jam këtu për të filluar nga e para, por për të vazhduar një histori që ka rrënjë të thella. Jam këtu për të shkruar një kapitull të ri në librin e gjatë të besimit dhe të dashurisë që kjo mitropoli ka shkruar ndër shekuj".

Me emocion të veçantë, Hirësi Anastasi falënderoi të paharruarin, Kryepiskopin Anastas, "ringritësin e madh të Kishës së Shqipërisë", që e ngriti Kishën tonë nga hiri i shkatërrimit të ateizmit, dhe Fortlumturinë e Tij, Kryepiskopin Joan, për vazhdimin e kësaj vepre me vizion, dashuri dhe sakrificë.

Duke iu drejtuar besimtarëve të zonës, Mitropoliti Anastas u zotua: "Ju siguroj se nuk vij mes jush për t'u shërbyer, por si shërbëtor. Nuk erdha si i huaj, por si vëlla. Dëshira ime është që bashkë të njihemi më thellë". Ai theksoi nevojën e unitetit dhe bashkëpunimit: "Nuk mund ta përmbush këtë mision pa ju. Kisha është një trup. Ju ftoj të gjithëve, klerikë dhe laikë, të bashkohemi në një frymë të re shërbimi. Të ndërtojmë ura, jo mure".

Duke njohur sfidat bashkëkohore, si materializmi, relativizmi dhe shpërfillja, Hirësia u zotua të jetë afër çdo besimtari, "me ndjeshmëri dhe drejtësi", të dëgjojë zërin e të rinjve, të moshuarve dhe familjeve. "Kisha duhet të jetë si një spital shpirtëror ku të gjithë të gjejnë shërim, si një shtëpi ku të gjithë të gjejnë ngrohtësi, si një shkollë ku të gjithë të mësojnë të vërtetën", theksoi ai.

Fortlumturia e Tij, Kryepiskopi Joan, në përshëndetjen e tij, vlerësoi aftësitë dhe kontributin e Mitropolitit të ri në Kishën e Shqipërisë, duke nënvizuar punën e tij të rëndësishme në administrimin e pasurisë kishtare dhe aktiviteteve ekonomike që nga viti 2017. Theksoi shërbimin e tij të shumanshëm si Drejtor Ekzekutiv i Institucionit Universitar "LOGOS" dhe pjesëmarrjen në institucione të ndryshme kishtare.

Hirësia e Tij, Mitropoliti i Korçës, Anastasi (Mamaj), lindi në Vlorë në vitin 1979. U diplomua nga Departamenti i Gjuhës Greke në Fakultetin Filozofik të Universitetit të Athinës, mori titull master në Administrim Biznes dhe diplomë në Studime Teologjike Sociale nga Kolegji Universitar "LOGOS". U hirotonis dhjakon në vitin 2018 dhe prift në vitin 2019 nga Kryepiskopi i ndjerë Anastas, mori titullin e Arkimandrit në vitin 2020 dhe u zgjodh Episkop i Krujës më 2024.

Fronëzimi i Mitropolitit Anastas shënon një epokë të re për Mitropolinë historike të Korçës, me shpresën e vazhdimit dhe forcimit të veprës së rilindjes shpirtërore dhe ndërtimit të një komuniteti Krishtqendror.

“KORÇA BOOM”