Goditje e rëndë për Skënderbeun U-19: Dy lojtarë mungojnë ndaj Aston Villës

Skuadra U-19 e Skënderbeut ka arritur një rezultat historik, duke barazuar me moshatarët e Aston Villës në ndeshjen e parë të vlefshme për raundin e UEFA Youth League. Një përballje ku korçarët treguan jo vetëm nivel të lartë loje, por edhe grintë, disiplinë taktike dhe dëshirë të jashtëzakonshme për sukses.

Djemtë e drejtuar nga trajnerët, Osmanllari dhe Çajku u përballën denjësisht me një emër të madh të futbollit europian, duke dëshmuar se futbolli i moshave në Shqipëri po ecën në drejtimin e duhur.

Megjithatë, për ndeshjen e kthimit, skuadra e Skënderbeut do të përballet me një pengesë të madhe: mungesën e dy titullarëve të rëndësishëm. Qendërmbrojtësi Emeodi dhe mesfushori organizator Oppong nuk do të udhëtojnë me ekipin për ndeshjen në Angli.

Burime pranë klubit bëjnë me dije se arsyeja lidhet me vështirësitë në pajisjen me vizë, pasi koha brenda dy javësh ka qenë e pamjaftueshme për përfundimin e procedurave të nevojshme. Kjo sjell një boshllëk të madh në formacionin e ekipit korçar, që tashmë duhet të gjejë zgjidhje alternative për të përballuar sfidën e kthimit.

Pavarësisht këtyre mungesave, Skënderbeu U-19 ka treguar se është një ekip me karakter dhe ambicie, dhe pa dyshim do të kërkojë të befasojë edhe në ndeshjen e kthimit, përballë një kundërshtari të nivelit të lartë si Aston Villa.

"KORÇA BOOM"