Greqia po i jep hapësirë, Shqipëria duhet të mos vonohet për talentin 17-vjeçar

Mesfushori shqiptar Fabio Refatllari feston sot 17-vjetorin, ndërsa vetëm katër ditë më parë bëri një hap të rëndësishëm në karrierën e tij, duke debutuar me ekipin e parë të Volos në Kupën e Greqisë.

Refatllari u aktivizua në sfidën ndaj Iraklis, të cilën Volos e fitoi me rezultatin 3-1. Talenti shqiptar qëndroi në fushë për 80 minuta, duke dhënë sinjale pozitive në paraqitjen e tij të parë me skuadrën e parë.

Debutimi në këtë moshë përbën një moment të rëndësishëm, veçanërisht në futbollin grek, ku nuk është e zakonshme që lojtarëve kaq të rinj t’u besohet një rol në ekipin e parë.

Refatllari duket se po bën përjashtim, duke fituar hapësirë dhe besimin e stafit teknik.

Paraqitjet e tij në këtë periudhë mund të bëjnë që emri i mesfushorit të jetë së shpejti në vëmendjen e përfaqësueses greke të moshave, duke e bërë situatën edhe më interesante për Shqipërinë.

Nëse Refatllari vazhdon me të njëjtin ritëm dhe arrin të konsolidohet në ekipin e parë të Volos, Kombëtarja shqiptare mund të ketë një tjetër talent për t’u ndjekur nga afër. Reparti i mesfushës, veçanërisht pozicioni përpara mbrojtjes, është një hapësirë ku një lojtar i ri me perspektivë mund të kthehet në një opsion të vlefshëm për të ardhmen.

Për momentin, Fabio Refatllari po shijon një moment të veçantë: vetëm 17 vjeç, me debutimin në ekipin e parë tashmë të regjistruar në CV dhe me një mundësi të madhe për të hedhur hapa të tjerë në karrierë.

“KORÇA BOOM”