Ja kush i solli “fat” trajnerit Ernest Gjoka në fitoren 3-0 ndaj Burrelit në Korçë!

Skënderbeu nisi me këmbë të mbarë kampionatin, duke fituar bindshëm 3-0 ndaj ekipit të Burrelit në stadiumin “Skënderbeu”. Një nisje që jo vetëm u prit mirë nga tifozët korçarë, por edhe shënoi një moment të veçantë për vetë trajnerin Ernest Gjoka.

Disa orë para startit të ndeshjes, në tribunën “VIP” të stadiumit u panë të pranishme bashkëshortja dhe vajza e trajnerit Gjoka, të cilat kishin ardhur për ta mbështetur nga afër. Prania e tyre duket se i solli fat trajnerit, që u largua nga fusha me tri pikë të plota dhe një performancë solide nga skuadra e tij.

Në përfundim të ndeshjes, Gjoka u pa i qeshur dhe i qetë, përshëndetja e parë pas fitores erdhi pikërisht nga familja e tij, e cila e shoqëroi emocionalisht në këtë debutim në shtëpi me fitore.

Pas shumë javësh përgatitjesh dhe pritjesh, fitorja ndaj Burrelit ishte më shumë sesa një rezultat sportiv, ishte një nisje me sinjale pozitive, ku mbështetja familjare dhe përkushtimi profesional u bashkuan për një fillim të suksesshëm.

Trajneri Gjoka tani synon të ruajë ritmin dhe të ndërtojë mbi këtë fitore, ndërsa duket se tashmë ka gjetur jo vetëm formulën në fushë, por edhe “fatin” në tribunë.

“KORÇA BOOM”