Kamioni merr përpara 3 makina në Greqi/ 8 të pl*gosur, mes tyre 2 fëmijë. Bllokohet rruga drejt Prevezës

Një aksident i rëndë trafiku ka ndodhur mesditën e së premtes, 14 gusht, në hyrje të tunelit nënujor të Aktionit, në anën e Prevezës.

Një kamion është përplasur me tre automjete, duke lënë të plagosur tetë persona, mes tyre edhe dy fëmijë.

Të plagosurit janë katër burra, dy gra dhe dy fëmijë. Ata janë transportuar me ambulanca të EKAB në Spitalin e Prevezës.

Sipas të dhënave paraprake, asnjëri prej tyre nuk ndodhet në rrezik për jetën.

Përplasja ka qenë e fortë dhe të katër automjetet kanë pësuar dëme të konsiderueshme.

Sipas informacioneve fillestare, kamioni me targa greke, i drejtuar nga një shtetas grek, ka goditur tre makina private, duke i marrë përpara dhe duke shkaktuar një përplasje të njëpasnjëshme.

Tre automjetet e përfshira në aksident rezultojnë të kenë targa të Italisë, Gjermanisë dhe Rumanisë.

Për shkak të përplasjes, në vendngjarje u mobilizuan menjëherë shërbimet e emergjencës. Departamenti i Zjarrfikësve të Prevezës zhvilloi një operacion për nxjerrjen e tre personave që kishin mbetur të bllokuar në automjete.

Pas nxjerrjes së tyre, të plagosurit iu dorëzuan ekipeve mjekësore dhe u transportuan në spital për trajtim.

Aksidenti solli edhe ndërprerje të menjëhershme të qarkullimit në zonë.

Në rrugën nga Aktio drejt Prevezës u krijuan radhë prej disa kilometrash, ndërsa qindra drejtues automjetesh mbetën të bllokuar.

Sipas medias lokale Preveza Today, drejtuesit e automjeteve të bllokuara në anën e Aktionit shprehën pakënaqësi për mungesën e informacionit mbi situatën dhe kohëzgjatjen e bllokimit.

Raportohet gjithashtu për prani të kufizuar të forcave të policisë në zonë, çka e vështirësoi menaxhimin e trafikut.

Shërbimet kompetente vijuan punën për largimin e automjeteve dhe normalizimin e qarkullimit.

Ndërkohë, autoritetet kanë nisur hetimet për të përcaktuar shkaqet dhe rrethanat e sakta të aksidentit.

“KORÇA BOOM”