“Korça Boom” njoftoi shitjen e Gramozit para disa ditësh, tashmë finalizohet marrëveshja, ja kush është pronari i ri

Është finalizuar ajo që u përfol pak ditë më parë nga “Korça Boom”. Klubi i futbollit Gramozi i Ersekës ka kaluar zyrtarisht në pronësi të biznesmenit italian Gerardo Masicci. Marrëveshja është mbyllur në bashkëpunim me Bashkinë e Ersekës dhe Federatën Shqiptare të Futbollit.

Sipas burimeve, vlera e kësaj marrëveshjeje arrin në 100 milionë lekë, një shumë e konsiderueshme që pritet të sjellë investime të reja për klubin dhe zhvillimin e futbollit në zonën juglindore të vendit.

Megjithatë, është bërë e ditur se stadiumi dhe fushat stërvitore do të mbeten pronë publike, nën administrimin e Bashkisë së Ersekës. Klubi, nga ana tjetër, do të menaxhohet tërësisht nga biznesmeni italian dhe stafi i tij.

Ky është një zhvillim i rëndësishëm për Gramozin dhe komunitetin sportiv të Ersekës. Objektivi kryesor pritet të jetë ngritja e klubit në nivele më të larta të futbollit shqiptar dhe krijimi i një strukture moderne për zhvillimin e talenteve të rinj.

Në ditët në vijim pritet që presidenti i ri të dalë në një konferencë për shtyp, ku do të prezantojë planet e tij për të ardhmen e Gramozit.

"Korça Boom"