Lajm sensasional /Federica Mogherini mes të dyshuarve në b*stisjet e policisë belge

Policia belge bastisi të martën shërbimin diplomatik të Bashkimit Evropian në Bruksel, së bashku me Kolegjin e Evropës në Bruges dhe disa shtëpi private, si pjesë e një hetimi mbi keqpërdorimin e dyshuar të fondeve të BE-së. Sipas Euroactiv, bastisjet u zhvilluan në orët e para të mëngjesit në të gjithë Belgjikën.

Policia sekuestroi dokumente dhe arrestoi tre persona për t’i marrë në pyetje nën dyshimin për mashtrim me prokurimin, korrupsion dhe konflikt interesi kriminal. Sipas mediave ndërkombëtare, në mesin e të arrestuarve është edhe rektorja e Kolegjit të Evropës, Federica Mogherini.

Një dëshmitar okular tha se rreth 10 oficerë të veshur me rroba civile hynë në selinë e Shërbimit Evropian të Veprimit të Jashtëm (EEAS) në orën 7:30 të mëngjesit. Një zyrtar tjetër i BE-së konfirmoi bastisjen.

Hetimi penal nisi pas akuzave se EEAS dhe Kolegji i Evropës, shkolla prestigjioze e trajnimit pasuniversitar për eurokratët, keqpërdorën fonde publike të BE-së gjatë viteve 2021 dhe 2022. Bastisjet janë skandali i fundit që godet institucionet e BE-së dhe rrit presionin mbi Kolegjin e Evropës dhe rektoren Federica Mogherini, e cila dikur drejtonte EEAS-in dhe filloi këtë vit një mandat të dytë pesëvjeçar në Bruges.

Autoritetet belge kontrolluan gjithashtu ambientet e Kolegjit të Evropës në Bruges dhe disa shtëpi private të individëve të përfshirë, duke ndaluar tre persona, sipas Euronews.

Zyra e Prokurorit Publik Evropian (EPPO) kërkoi bastisjet si pjesë e një hetimi mbi mashtrimin e dyshuar në lidhje me një projekt trajnimi të financuar nga BE për diplomatë të rinj. Hetimi fokusohet në Akademinë Diplomatike të Bashkimit Evropian, një trajnim nëntëmujor për diplomatë të rinj, i dhënë në bazë të një tenderi nga Kolegji i Evropës midis viteve 2021 dhe 2022.

Autoritetet po hetojnë gjithashtu nëse EEAS ka shkelur rregullat e tenderimit duke ndarë informacion me Kolegjin para dhënies së projektit.

"KORCA BOOM"