Lëvizje të rrezikshme në aksin Ersekë–Leskovik, policia identifikon dhe ndëshkon shoferin

Pas publikimit të një videoje në rrjete sociale, ku shfaqej një automjet që kryente manovra të rrezikshme dhe lëvizje të pakontrolluara në aksin rrugor Ersekë–Leskovik, specialistët e qarkullimit rrugor kanë kryer menjëherë verifikimet përkatëse. Si rezultat i këtyre veprimeve, është identifikuar drejtuesi i automjetit, shtetasi O. I.

Në bazë të pikës 10 të nenit 141 dhe pikës 3 të nenit 127 të Kodit Rrugor, ndaj këtij shtetasi është vendosur masa administrative me gjobë në vlerën 12 000 lekë, si dhe zbritja e 10 pikëve nga leja e drejtimit.

Drejtoria Vendore e Policisë Korçë apelon për respektimin e rregullave të qarkullimit rrugor dhe fton qytetarët që të denoncojnë çdo shkelje në numrin 112, duke garantuar reagim të menjëhershëm dhe në përputhje me ligjin.

"KORCA BOOM"