Marjeta Zaçe – Kampionja që mbeti gjithmonë e para, gruaja që fluturoi mbi çdo kufi

Marjeta Pronjari, më vonë e njohur si Marjeta Zaçe, është një nga figurat më të ndritura të sportit shqiptar. E lindur më 3 shtator 1951 në Korçë, ajo është një emër që për dekada ka frymëzuar sportistë të rinj dhe ka lënë gjurmë të thella në historinë e atletikës shqiptare.

Karriera e saj sportive nisi në moshë shumë të re. Në moshën 15-vjeçare ajo fitoi titullin "Mjeshtre Sporti", dhe vetëm dy vite më vonë u shpall “Mjeshtre e Merituar e Sportit”, një arritje e jashtëzakonshme për kohën. Marjeta u bë kampione kombëtare për shtatë vite rresht në disiplinat e kërcimit së larti dhe pesëgarëshit, duke vendosur 31 rekorde kombëtare në harkun kohor 1964–1974.

Një nga momentet kulmore të karrierës së saj ishte në vitin 1970, kur në Universiadën e Torinos ajo arriti një rezultat prej 1.73 metra në kërcim së larti, një rekord i ri kombëtar dhe një performancë që e renditi mes kërcyeseve më të mira në Evropë për atë periudhë. Pavarësisht vështirësive politike dhe mungesës së pjesëmarrjes në gara ndërkombëtare të rregullta, emri i saj u bë simbol i klasit dhe përkushtimit sportiv.

Pas përfundimit të karrierës në atletikë, Marjeta kaloi në volejboll, duke qenë pjesë e ekipit kombëtar gjatë viteve 1974–1979. Më pas, ajo iu përkushtua karrierës akademike si pedagoge dhe më vonë drejtore katedre në Institutin e Kulturës Fizike “Vojo Kushi”. Për disa vite mbajti edhe poste të rëndësishme në Komitetin Olimpik Shqiptar dhe në administratën publike.

Nga viti 1991, ajo u përfshi në politikë si anëtare e Partisë Demokratike. Ka shërbyer si deputete në Kuvendin e Shqipërisë dhe zëvendësministre në Ministrinë e Punës dhe Çështjeve Sociale.

Figura e Marjeta Pronjari-Zacës nuk përfaqëson vetëm suksesin sportiv, por edhe modelin e një gruaje që nuk u ndal asnjëherë përballë sfidave. Ajo është një emër që sot nderohet si pjesë e panteonit të sportit shqiptar.

“KORÇA BOOM”