Mihal Grameno, biri i Korçës që i dha Shqipërisë zemrën e luftëtarit dhe penën e publicistit

Më 5 shkurt 1931 u nda nga jeta Mihal Grameno, biri i Korçës dhe një nga figurat më të shquara të Rilindjes Kombëtare shqiptare. I lindur në Korçë më 13 janar 1871, Grameno ishte veprimtar i palodhur i çështjes kombëtare, luftëtar në çetën e Çerçiz Topullit, botues, publicist dhe shkrimtar, që i vuri penën dhe pushkën në shërbim të Shqipërisë.

Emri i tij lidhet ngushtë me Korçën atdhetare, me shtypin patriotik dhe me përpjekjet për ndërgjegjësimin politik e kombëtar të shqiptarëve në një nga periudhat më vendimtare të historisë sonë. Në letërsinë shqiptare, Mihal Grameno njihet kryesisht si publicist dhe pamfletist i guximshëm i jetës politike, një zë kritik dhe i drejtpërdrejtë që pasqyroi realitetin e kohës me forcë dhe atdhedashuri.

Korça i dha Shqipërisë një mendje të ndritur dhe një zemër luftëtari. Trashëgimia e tij nuk qëndron vetëm në veprimtarinë e tij politike dhe letrare, por edhe në frymën atdhetare që frymëzoi breza të tërë shqiptarësh. Sot, nderimi dhe kujtimi i Mihal Gramenos mbeten të përjetshëm, një simbol i guximit, i integritetit dhe i dashurisë për kombin.

"KORCA BOOM"