Momente dramatike, portieri ndërroi jetë pas një penalltie

Një moment gëzimi u kthye në tragjedi në Brazil gjatë një ndeshje futsalli mes ekipeve Sind Moto dhe FBV Futsal, kur portieri Antônio Edson dos Santos Sousa humbi jetën pak sekonda pasi ndali me sukses një penallti.

Sipas raportimeve, Edson kishte shkëlqyer me një pritje të jashtëzakonshme që mbajti në lojë skuadrën e tij. Pas momentit të lavdisë, ai u ngrit dhe shkoi të festonte me shokët e ekipit, por vetëm pak çaste më vonë u rrëzua papritur në tokë. Reagimi i shpejtë i lojtarëve dhe kundërshtarëve tregoi se situata ishte serioze. Ata kërkuan menjëherë ndihmë mjekësore.

Ndihma e parë u dha në fushë dhe më pas Edson u transportua me urgjencë në spitalin më të afërt. Pavarësisht përpjekjeve të mjekëve, portieri nuk mundi të mbijetonte.

Lajmi për ndarjen nga jeta të 38-vjeçarit shkaktoi pikëllim të thellë në komunitetin sportiv brazilian. Në një deklaratë zyrtare, organizatorët e turneut dhe komuniteti i futsallit në përgjithësi shprehën dhimbjen për humbjen e një sportisti shembullor:

"Me trishtim të thellë morëm lajmin për ndarjen nga jeta të Antônio Edson dos Santos Sousa, një atlet që shënoi karrierën e tij me përkushtim, talent dhe frymë ekipi. Jo vetëm për lojtarin shembullor që ishte, por edhe për personin e veçantë që i magjepsi të gjithë. Në këtë kohë pikëllimi, shprehim ngushëllimet tona më të sinqerta familjes, miqve dhe të gjithë komunitetit sportiv, të cilët do të gjejnë kujtime të bukura të trashëgimisë së tij të frymëzimit dhe pasionit për futsalin."

Shkaku i vdekjes nuk është bërë ende zyrtar, por dyshohet për arrest kardiak. Autoritetet shëndetësore dhe sportive kanë nisur hetimet për të sqaruar rrethanat e ngjarjes.

“KORÇA BOOM”