Ndryshon harta e Shqipërisë? PS nxjerr në tryezë 4 modele

Partia Socialiste e Shqipërisë ka prezantuar katër variante për reformën e re territoriale, të cilat synojnë riorganizimin e pushtetit vendor në vend.

Varianti i parë parashikon bashkimin e bashkive të vogla me ato më të mëdha fqinje, si një mënyrë për të rritur efikasitetin dhe për të reduktuar fragmentimin.

Ndërsa varianti i dytë propozon krijimin e bashkive të mëdha në nivelin e ish-rretheve, duke ulur numrin aktual të bashkive nga 61 në 36.

Varianti i tretë ruan ndarjen aktuale me 61 bashki, por ndryshon strukturën e drejtimit, duke i dhënë rol ekzekutiv qarqeve dhe duke parashikuar zgjedhjen e drejtpërdrejtë të kryetarit të qarkut nga qytetarët.

Ndërkohë, varianti i katërt synon krijimin e katër rajoneve të mëdha, duke konsoliduar bashkitë e vogla dhe duke kaluar në një model më të centralizuar administrimi.

Këto opsione u prezantuan për herë të parë nga Arbjan Mazniku, bashkëkryetar i komisionit të reformës territoriale, gjatë mbledhjes së zgjeruar qeveri–grup parlamentar të zhvilluar në Pallati i Brigadave.

Nga ana tjetër, kryetari i Kuvendit, Niko Peleshi, deklaroi nga Maliq se këto variante do të hidhen për diskutim të gjerë, duke theksuar se do të merren në konsideratë edhe propozimet e Partia Demokratike e Shqipërisë, me synimin për të arritur një reformë sa më konsensuale.

Reforma territoriale pritet të jetë një nga debatet më të rëndësishme politike në vijim, pasi prek drejtpërdrejt organizimin administrativ dhe qeverisjen vendore në vend.

“KORÇA BOOM”