Nga netët shqiptare tek kapllanët e legjendave, trashëgimia e Mitrush Kutelit që vazhdon të frymëzojë letërsinë shqiptare

Më 13 shtator 1907, në qytetin e Pogradecit, lindi Dhimitër Pasko, i njohur në letërsinë shqipe me emrin e tij letrar Mitrush Kuteli (1907–1967). Ai mbetet një nga figurat më të rëndësishme të letrave shqipe të shekullit XX, duke u dalluar jo vetëm si shkrimtar i talentuar, por edhe si ekonomist e përkthyes i shkëlqyer.

Proza e Kutelit shquhet për gjuhën e pasur, ritmin poetik dhe aftësinë për të përshkruar jetën shqiptare me një realizëm të thellë, të ndërthurur mjeshtërisht me elemente miti e legjende. Përmes rrëfimeve të tij ai solli në faqet e librit frymën e vendlindjes dhe botën shpirtërore të shqiptarëve, duke i dhënë lexuesit një pasqyrë të gjallë të traditës, zakoneve dhe ëndrrave të tyre.

Ndër veprat e tij më të njohura janë “Net shqiptare” (1942), “Ago Jakupi” (1943), “Kapllan Aga i Shaban Shpatës” (1944) dhe përmbledhja poetike “Këngë e brishtë”. Përveç krijimtarisë origjinale, Kuteli dha një kontribut të madh edhe si përkthyes, duke sjellë në gjuhën shqipe autorë klasikë e modernë nga letërsia botërore, gjë që pasuroi kulturën letrare shqiptare dhe e bëri atë më të hapur ndaj rrymave ndërkombëtare.

Mitrush Kuteli la pas një trashëgimi të vyer letrare dhe mbetet edhe sot një pikë referimi për letërsinë dhe kulturën shqiptare, një zë që vazhdon të frymëzojë breza të tërë lexuesish e shkrimtarësh.

“KORÇA BOOM”