POLICIA/ Pezullohet nga detyra punonjësi i policisë në detyrë, në PKK Qafë Thanë

Disa orë më parë, JOQ Albania publikoi me pamje denoncimin e një qytetari që ndodhej në pikën kufitare të Qafë Thanës, i cili ankohej se punonjësit e Policisë kalonin makina jashtë radhe, ndërkohë që qytetarët e tjerë prisnin në trafik.

Për këtë ngjarje ka ardhur një reagim nga Drejtoria Vendore për Kufirin dhe Migracionin në Korçë. Bëhet e ditur se pas publikimit të pamjeve, është bërë pezullimi i inspektorit me inicialet R. S., i cili në video shfaqet duke takuar një qytetar, dhe menjëherë pas tij i bën me shenjë një shoferi që të futet jashtë radhe mes autobusëve.

“E katërta makinë është, ne kemi dy orë këtu. Turp policia!” thotë qytetari në video.

Reagim i Drejtorisë Vendore për Kufirin dhe Migracionin Korçë

Në lidhje me një video të postuar në rrjete sociale, që pasqyron denoncimin e një qytetari për veprimet e një punonjësi policie në detyrë, në PKK Qafë Thanë, bëjmë me dije se:

Drejtori i DVKM Korçë, sapo u njoh me rastin, ka pezulluar menjëherë nga detyra punonjësin e Policisë që shfaqet në video, inspektor R. S.

Gjithashtu, Drejtori i DVKM Korçë ka nisur ndaj punonjësit të Policisë hetim disiplinor, në zbatim të nenit 121 të ligjit nr. 82/2024, “Për Policinë e Shtetit”, pika 1, germa “m”, “Kryerja e veprimeve që cenojnë rëndë figurën e punonjësit të policisë, institucionit apo shërbimit policor në tërësi”.

Materialet i kaluan Drejtorisë së Standardeve Profesionale në DPPSh e cila do të kryejë hetim më të thelluar për rastin.

Drejtoria Vendore e Kufirit dhe Migracionit Korçë fton qytetarët që të denoncojnë çdo rast shkeljeje apo paligjshmërie që konstatojnë, dhe i garanton ata se do të ketë një reagim të menjëhershëm, konform ligjit.

“KORÇA BOOM”