Rama përgatit furtunën në PS, më 14 nëntor priten ndryshime të mëdha në qeveri!
Mbledhja e Asamblesë Kombëtare të Partisë Socialiste, e planifikuar për 14 nëntor, pritet të shoqërohet me zhvillime të rëndësishme politike dhe ndryshime në strukturat drejtuese të mazhorancës.
Sipas raportimeve të medias Pamfleti, kryeministri Edi Rama po përgatit një riorganizim të drejtuesve politikë në qarqe, ndërsa në tryezë pritet të jetë edhe një rikonfigurim i kabinetit qeveritar.
Një nga çështjet kryesore që pritet të marrë vëmendje është situata në Bashkinë e Tiranës dhe përplasjet politike që lidhen me Erion Veliajn. Sipas burimeve të përmendura në raportim, Rama pritet të marrë vetë drejtimin politik të qarkut të Tiranës, duke mobilizuar strukturat socialiste në kryeqytet.
Por lëvizjet e mundshme nuk ndalen këtu. Në qarqet e mazhorancës përflitet largimi i ministres së Arsimit, Mirela Kumbaro, ndërsa në vend të saj mund të emërohet Albana Koçiu, aktualisht zëvendëskryeministre.
Në këtë skenar, postin e zëvendëskryeministrit mund ta marrë Ulsi Manja, ish-ministër i Drejtësisë dhe aktualisht kryetar i Komisionit parlamentar të Ligjeve.
Një tjetër emër që përmendet për rikthim në qeveri është Erion Braçe. Sipas raportimit, atij mund t'i ofrohet drejtimi i Ministrisë së Bujqësisë, në një kohë kur përflitet edhe për ambicien e tij për të kandiduar për Bashkinë e Tiranës.
Asambleja pritet të diskutojë gjithashtu edhe një strategji të re për zgjedhjet e ardhshme, ku mund të ketë ndryshime në mënyrën e përzgjedhjes së kandidatëve për deputetë. Disa prej figurave që kanë përfituar mandate nga listat e sigurta në zgjedhjet e vitit 2025 mund të përballen me garën në listat e hapura.
Në fokus pritet të jetë edhe riorganizimi i strukturave të PS-së në Tiranë, ku nuk përjashtohet rikthimi i disa figurave të njohura të partisë.
Të gjitha këto zhvillime mbeten në kuadrin e skenarëve dhe informacioneve të raportuara nga Pamfleti dhe nuk përbëjnë vendime zyrtare të Partisë Socialiste apo konfirmime për ndryshime në qeveri.
“KORÇA BOOM”
