Fermerët kanë mundësinë të kursejnë mijëra lekë, ja çfarë falet deri në fund të vitit 2026!
Një lehtësi e rëndësishme financiare u vjen fermerëve që jetojnë në fshat dhe zotërojnë tokë bujqësore. Ata kanë mundësinë të shlyejnë detyrimet e prapambetura për sigurimet shoqërore dhe shëndetësore pa paguar kamatëvonesa apo penalitete.
Sipas skemës në fuqi, fermerët që banojnë në zonat fushore duhet të paguajnë 38 mijë e 400 lekë në vit, ndërsa ata që jetojnë në zonat malore përfitojnë një detyrim më të ulët, prej 29 mijë e 400 lekësh në vit.
Eksperti i sistemit të pensioneve, Kujtim Hoxha, shpjegon për A2 CNN se kjo masë u krijon mundësi fermerëve të mbyllin detyrimet e akumuluara ndër vite, duke paguar vetëm vlerën bazë të kontributeve, pa interesat dhe gjobat e krijuara.
Falja e kamatëvonesave dhe penaliteteve bazohet në ligjin për fshirjen e detyrimeve të papaguara në tatime, dogana dhe pushtetin vendor, të miratuar në fund të vitit të kaluar.
Periudha që përfshihet në këtë lehtësi nis nga 1 janari 2015 dhe përfundon më 31 dhjetor 2024. Kushti kryesor për të përfituar është që kontributet e plota të paguhen brenda datës 31 dhjetor 2026.
Eksperti Hoxha paralajmëron se fermerët duhet të shfrytëzojnë afatin e përcaktuar, pasi pas përfundimit të tij detyrimet e papaguara do të vijojnë të mbeten aktive.
Kjo masë synon t'u japë mundësi fermerëve të rregullojnë marrëdhëniet me skemën e sigurimeve dhe të shmangin barrën financiare të krijuar nga kamatëvonesat ndër vite.
“KORÇA BOOM”
