Reformë e thellë në Policinë Bashkiake, ja si do të ndryshojë funksionimi në bashki

Projektligji i prezantuar nga ministrja parashikon një riorganizim të Policisë Bashkiake, duke vendosur një strukturë të re funksionimi në dy nivele: qendror dhe vendor. Qëllimi kryesor i kësaj reforme është vendosja e standardeve të njëjta profesionale dhe funksionale në të gjitha bashkitë e vendit, si dhe rritja e efikasitetit të shërbimit ndaj komunitetit.

Sipas projektligjit, niveli qendror do të ketë rol koordinues dhe mbështetës. Ai do të jetë përgjegjës për hartimin e standardeve kombëtare, koordinimin e punës së drejtorive vendore dhe forcimin e bashkëpunimit ndërinstitucional. Ky nivel nuk do të ndërhyjë në kompetencat e njësive të vetëqeverisjes vendore, por do të shërbejë si garanci për zbatimin e njëtrajtshëm të ligjit në të gjithë territorin.

Ndërkohë, niveli vendor do të vazhdojë të ushtrojë autoritet të plotë në terren, me kompetenca të shtuara operacionale. Bashkitë do të kenë mundësi të ofrojnë shërbime më cilësore, më të shpejta dhe më efektive për qytetarët, duke u përshtatur më mirë me nevojat konkrete të komuniteteve lokale.

Reforma synon të forcojë rolin e Policisë Bashkiake si një strukturë më profesionale, më e koordinuar dhe më pranë qytetarit, duke garantuar standarde të unifikuara, por edhe autonomi funksionale në nivel vendor.

"KORCA BOOM"