Samuel Nikaj “gjuan” sërish drejt Korçës: Dy futbollistë në radarët e Burrelit

Trajneri i Burrelit, Samuel Nikaj, duket se nuk po heq dorë nga bashkëpunimi me futbollistët korçarë. Burime të sigurta pranë klubit bëjnë të ditur se në planet e teknikut për sezonin e ri janë dy emra të njohur për të: mesfushori Jorgo Qeleshi dhe sulmuesi Kostika Beçka.

Të dy futbollistët kanë qenë pjesë e Pogradecit sezonin e kaluar, pikërisht nën drejtimin e Nikajt, dhe mesa duket bashkëpunimi i mëparshëm ka lënë mbresa pozitive. Oferta zyrtare tashmë u është paraqitur të dyve dhe besohet se janë afër një marrëveshjeje për të vijuar karrierën e tyre në Burrel.

Nëse gjithçka shkon sipas parashikimeve, Qeleshi dhe Beçka do të jenë përforcime të rëndësishme për skuadrën matjane, e cila synon një paraqitje dinjitoze në sezonin e ri të Kategorisë së Parë.

“KORÇA BOOM”