Shifra, kuriozitete dhe rekorde pas 12 javëve të Kategorisë së Parë

Kategoria e Parë ka mbyllur javën e 12-të me një sërë statistikash interesante, rekorde të reja dhe situata që japin një panoramë të qartë mbi ecurinë e skuadrave në këtë fazë të kampionatit.

Një nga shifrat më domethënëse të kësaj jave është “0”, e cila i përket vetëm Kukësit. Verilindorët ishin skuadra e vetme që nuk arritën të shënonin, duke thelluar krizën më të madhe të sezonit. Nga ana tjetër, vetëm një skuadër arriti përmbysje këtë javë: Kastrioti, i cili ktheu rezultatin ndaj Besës në një nga ndeshjet më emocionuese të kampionatit.

Diferencat në renditje janë po aq të ngushta sa edhe emocionet në fushë. Vetëm dy pikë ndajnë Apoloninë e vendit të pestë nga Korabi në vendin e tetë. Tre ndeshje të javës u mbyllën me të njëjtin rezultat, 2–1: Pogradeci triumfoi ndaj Lushnjës në transfertë, Skënderbeu fitoi në Burrel, ndërsa Kastrioti mori tre pikë në shtëpi ndaj Besës.

Laçi vazhdon të humbasë terren për shkak të barazimeve. Katër barazime në 12 javë, përfshirë edhe atë të fundit ndaj Ilirisë, e kanë lënë skuadrën 9 pikë larg Skënderbeut kryesues. Megjithatë, kurbinasit krenohet me një rekord të rëndësishëm: vetëm 7 gola të pësuar, duke u renditur si mbrojtja më e fortë e kampionatit.

Në të kundërt, Kukësi mban sulmin më të dobët, me vetëm 7 gola të shënuar në 12 javë. Ndërkohë Skënderbeu vazhdon dominimin me 23 gola të realizuar dhe një total prej 31 pikësh, rezultat i 10 fitoreve, një barazimi dhe vetëm një humbjeje – bilanci më i mirë i kampionatit deri tani.

Goli më i vonë i javës u shënua në minutën e 92-të nga Orest Kasmollari i Kastriotit, një gol me vlerën e tre pikëve në duelin dramatik ndaj Besës. Në total, java e 12-të prodhoi 15 gola, me një mesatare prej 2.5 golash për ndeshje. Në shkallë të përgjithshme, kampionati ka regjistruar 162 gola në 12 javë, që përkthehet në 2.25 gola për ndeshje.

"KORCA BOOM"