Shkon të ndezë një qiri, makina i përfshihet nga flakët

Një automjet është përfshirë nga flakët dhe është djegur plotësisht në parkimin e teqesë së fshatit Kreshovë, në Kolonjë.

Sipas informacioneve paraprake, zjarri dyshohet të ketë qenë aksidental. Drejtuesi i mjetit ka deklaruar se kishte hyrë në ambientet e teqesë për të ndezur një qiri dhe, në ato momente, automjeti i tij është përfshirë nga flakët.

Menjëherë pas njoftimit, në vendngjarje ka mbërritur shërbimi zjarrfikës, i cili ka ndërhyrë duke bërë të mundur fikjen e zjarrit dhe shmangien e përhapjes së flakëve në zonën përreth.

Pavarësisht ndërhyrjes, mjeti është djegur totalisht, duke pësuar dëme të konsiderueshme materiale.

Nga ana e policisë po kryhen veprimet procedurale për të zbardhur plotësisht rrethanat dhe për të përcaktuar shkakun e saktë të zjarrit.

“KORÇA BOOM”