Shpejtësia fatale: Automjeti përplaset me dyqan pas ndjekjes policore

Tre shtetas shqiptarë janë plagosur rëndë pasi tentuan t’i shpëtonin policisë gjermane në Olsberg. Ngjarja ndodhi në orët e para të ditës së djeshme, kur automjeti me të cilin po udhëtonin doli nga kontrolli gjatë arratisjes dhe u përplas me një dyqan veshjesh nusërie, duke shkaktuar dëmtime të mëdha materiale dhe lëndime serioze.

Pasagjeri që ndodhej në sediljen e përparme është në gjendje kritike, me fraktura në shtyllën kurrizore dhe në shpatulla. Edhe dy personat e tjerë ndodhen në gjendje të rëndë.

Sipas policisë, patrulla vuri re automjetin gjatë kontrollit të trafikut, por ai përshpejtoi sapo pa uniformat. Oficerët tentuan ta ndiqnin, por e humbën nga shpejtësia. Aksidenti ka ndodhur rreth një kilometër e gjysmë nga vendi ku makina u dallua fillimisht.

Hetimet tregojnë se mjeti doli nga rruga në një kthesë majtas për shkak të shpejtësisë së lartë dhe përfundoi i përplasur në vitrinën e dyqanit, duke e shkatërruar atë dhe duke u rrëzuar deri në çatinë e objektit. Zjarrfikësit raportuan se dy nga personat u nxorën nga rrënojat, ndërsa i treti u gjet jashtë automjetit. Zona është mbuluar nga mbeturina dhe dyqani ka pësuar dëme të konsiderueshme.

Policia njoftoi se ndaj njërës prej personave ekziston një urdhër arresti për vepra kundër pronës, ndërsa dy të tjerët dyshohet të kenë qenë nën efektin e alkoolit. Për shkak se nuk dihet kush po drejtonte mjetin, u morën mostra gjaku nga të dy pasagjerët. Shkaqet e arratisjes po hetohen ende.

"KORCA BOOM"