Skadon moratoriumi 10-vjeçar për gjuetinë Rikthehet aktiviteti me rregulla të reja dhe gjoba deri në 1.3 milionë lekë

Nga muaji gusht ka hyrë në fuqi një ndryshim i rëndësishëm në legjislacionin për gjuetinë në Shqipëri, pas përfundimit të memorandumit 10-vjeçar që ndalonte këtë aktivitet në nivel kombëtar. Me skadimin e këtij moratoriumi, gjuetia rikthehet si aktivitet i ligjshëm, por vetëm në zona të caktuara dhe nën kushte të reja ligjore.

Ministria e Turizmit dhe Mjedisit ka hedhur për konsultim publik projektligjin e ri “Për gjuetinë”, i cili parashikon një sërë masash për rregullimin dhe menaxhimin e këtij aktiviteti, duke synuar ruajtjen e ekuilibrave të natyrës dhe shtimin e popullatës së faunës së egër.

Sipas projektligjit, zonat e gjuetisë mund t’u jepen subjekteve private përmes një procedure konkurrimi dhe për një afat jo më të shkurtër se 10 vjet.

Arsyetimi kryesor për këtë afat është se, sipas ekspertëve të fushës, përgatitja e gjahut kërkon të paktën 5 vite. Subjekti që fiton të drejtën për zonën do të jetë gjithashtu përgjegjës për menaxhimin e saj.

Megjithatë, eksperti i mjedisit Aleksandër Trajçe, Drejtor Ekzekutiv i PPNEA, shprehet se projektligji i ri nuk sjell ndryshime të thella krahasuar me nismat e mëparshme. Sipas tij, problemi kryesor mbetet mungesa e të dhënave të besueshme për efektet që pati moratoriumi në shtimin apo mbrojtjen e jetës së egër gjatë një dekade./ CNA

“KORÇA BOOM”