Skënderbeu “mbipopullohet” me portierë – Dilemë për stafin: Si do të zgjidhet enigma në portë?

Situata në portën e Skënderbeut këtë sezon ka marrë një tjetër dinamikë. Klubi korçar aktualisht ka në dispozicion katër portierë, çka ka sjellë një “mbipopullim” në këtë repart, duke e kthyer në një nga pikat më të ndërlikuara për stafin teknik.

Konkurenca është rritur ndjeshëm, ndërsa mbetet për t’u parë se si do të menaxhohet situata në javët në vijim.

Në krye të listës është Marko Alia, i cili mbajti peshën kryesore të portës gjatë sezonit të kaluar dhe u paraqit me shumë stabilitet. Ai shihet si një prej alternativave kryesore edhe për këtë sezon.

Pas tij vjen Kristiano Rroku, një portier i ri dhe me shumë talent, por që ka pasur pak hapësira në fushë dhe ka nevojë për më shumë minuta për të treguar vlerat e tij.

Skuadrës i është bashkuar gjithashtu edhe Amarildo Dervishaj, pas një eksperience me Kukësin. Ai pritet të jetë pjesë e rëndësishme e grupit dhe duket se ka shanse reale për të fituar vendin e titullarit, në varësi të formës që do të tregojë në fazën përgatitore.

Së fundmi, grupit i është shtuar edhe super talenti Demirshaj, i cili vjen nga ekipi kampion i Skënderbeut U-19. Ai është konsideruar si një nga portierët më premtues të moshave dhe përfshirja në ekipin e parë është një hap i madh në zhvillimin e tij.

Kjo situatë ka vënë në vështirësi stafin teknik të korçarëve, që tashmë duhet të marrë një vendim përfundimtar se cilët do të jenë portierët që do të mbeten pjesë e grupit për sezonin e ri dhe kush do të ketë statusin e titullarit.

“KORÇA BOOM”