Sylvinho pas fitores me Jordaninë: Kombëtarja është derë e hapur për çdo lojtar

Trajneri i Kombëtares, Sylvinho, ka folur për mediat pas fitores me rezultatin 4-2 ndaj Jordanisë, në miqësoren e zhvilluar në stadiumin “Air Albania”. Ai e cilësoi sfidën si një mundësi të mirë për të testuar elementë të rinj dhe për të nderuar figura të rëndësishme të Kombëtares, si Elseid Hysaj.

"Ka qenë një ndeshje shumë e veçantë dhe e rëndësishme, veçanërisht për Hysajn. Ai ka pasur një rrugëtim të gjatë në Kombëtare dhe i uroj shumë fat në vazhdim."

Sylvinho u shpreh i kënaqur me paraqitjen e skuadrës dhe me ndryshimet që u provuan gjatë ndeshjes.

"Jam i kënaqur me rezultatin dhe me disa ndryshime që provuam. Dajsinani, Çaka dhe Gripshi bënë një ndeshje shumë të mirë. Bajrami u zhvendos në krahun e djathtë dhe dha një paraqitje pozitive, ashtu si edhe Broja që manovroi mirë në sulm."

Ai foli gjithashtu për konkurrencën në skuadër, duke e cilësuar si një "dhimbje koke" pozitive për stafin teknik.

"Opsionet që kemi në grup na japin dhimbje koke të mira. Ne i ndjekim të gjithë lojtarët çdo fundjavë. Kombëtarja është një derë e hapur për këdo që është në formë."

Trajneri ndaloi edhe te forma e Arbër Hoxhës:

"Hoxha ka treguar rritje të madhe në ndeshjet e fundit. Ka pasur një dëmtim para pak kohësh, por kemi qenë në kontakt të vazhdueshëm me klubin e tij. Po bën shumë mirë dhe është një aset për ne."

Për sa i përket konkurrencës në repartin ofensiv, ai shtoi:

"Pozicioni ku luan Anis Mehmeti është shumë i mbipopulluar. Aty kemi lojtarë si Broja, Muçi, Bajrami, Uzuni, Hoxha. Ndërkohë, në krahun e djathtë situata është më e hapur, ndaj jemi gjithmonë në kërkim të alternativave."

“KORÇA BOOM”