Tregu i arit në Shqipëri pas luhatjeve ndërkombëtare

Rritja e ndjeshme e çmimit të arit në tregjet ndërkombëtare ka tërhequr vëmendjen e investitorëve dhe bankave qendrore. Shkaktarët kryesorë janë pasiguria ekonomike dhe gjeopolitike, pritshmëritë për uljen e normave të interesit nga Rezerva Federale e SHBA-së dhe dëshira për të ruajtur vlerën përballë dobësimit të dollarit dhe inflacionit.

Vetëm më 20 tetor, ari u këmbye për mbi 4,347 dollarë për ons, një nivel ende i lartë, edhe pse ka patur ulje të herëpashershme nga 5 deri në 7 për qind.

Investitorët e shohin arin si aset sigurie

Sa herë që ka destabilizim, investitorët e shohin arin si aset sigurie dhe kështu rritet kërkesa dhe çmimi, shpjegon eksperta e financave, Besart Tafa.

Ky trend nuk është i rezervuar vetëm për investitorët privatë. Edhe bankat përdorin një pjesë të rezervës së tyre në ari, si mënyrë për të ruajtur besueshmërinë financiare dhe stabilitetin e bankës qendrore.

Rezervat e arit të bankës së shqipërisë

Banka e Shqipërisë aktualisht mban 1.56 ton ari, që përfaqëson rreth 4.5 për qind të rezervës totale valutore. Vlera e tregut të këtij ari është rreth 300 milionë euro. Kjo rendit Shqipërinë në vendin e 95-të nga 120 vende sipas rezervave zyrtare të arit në botë.

Në tetë muajt e parë të 2025, rezerva ka arritur në 317 milionë euro, një rritje prej 28 për qind krahasuar me të njëjtën periudhë të vitit 2024. Ekspertët theksojnë se kjo rritje është një hap drejt stabilitetit financiar dhe përgatitjes për integrimin në Bashkimin Evropian.

çmimi i arit në tregun shqiptar

Luhatjet në bursat ndërkombëtare reflektohen edhe në Shqipëri. Sot, një gram ar shitet për 9,000–12,000 lekë, ndërsa pesë vitet e fundit çmimi ka qenë 4,000–7,000 lekë për gram.

Shitësi Bledar Spahi shpjegon se me këtë rritje është bërë më e vështirë të blihen sasi të mëdha:“Blejmë për ditëlindje, festa, dhurata. Tani nuk ka më blerje të mëdha të lehta. Parashikimet janë që çmimi mund të arrijë deri në 150,000 lekë për gram ar të pastër.”

Investimi afatgjatë në ari

Ekspertët këshillojnë qytetarët që të ruajnë arin si investim afatgjatë, pasi vlera e tij pritet të rritet më tej. Në kohë krize, rezervat e arit forcojnë besimin e publikut dhe të tregjeve në monedhën kombëtare dhe stabilitetin e bankës qendrore.

"KORÇA BOOM"