Të qeta nënat e ardhshme: Paracetamoli nuk dëmton foshnjën

Agjencia Europiane e Barnave (EMA) ka konfirmuar se paracetamoli, i njohur gjithashtu si acetaminofen, mbetet një zgjedhje e sigurt për trajtimin e dhimbjes dhe temperaturës tek gratë shtatzëna, kur përdorimi i tij është klinikisht i domosdoshëm.

Sipas EMA-s, nuk ka asnjë provë që të kërkojë ndryshim të rekomandimeve aktuale të Bashkimit Europian për përdorimin e këtij medikamenti gjatë shtatzënisë.

“Paracetamoli mbetet një zgjedhje e rëndësishme për trajtimin e dhimbjes apo temperaturës gjatë shtatzënisë,” deklaroi Steffen Thirstrup, Shefi Mjekësor i EMA-s. Ai theksoi se analizat e deritanishme të të dhënave shkencore nuk kanë gjetur prova që marrja e paracetamolit gjatë shtatzënisë shkakton autizëm tek fëmijët.

EMA shton gjithashtu se të dhënat në dispozicion nuk tregojnë ndonjë lidhje mes përdorimit të paracetamolit dhe rrezikut për malformime tek fetusi apo të porsalindurit.

Në vitin 2019, një rishikim i disa studimeve mbi zhvillimin neurologjik të fëmijëve të ekspozuar ndaj paracetamolit gjatë shtatzënisë rezultoi se provat ishin të paqarta dhe nuk u vërtetua ndonjë lidhje me çrregullime neurozhvillimore.

Megjithatë, EMA thekson se paracetamoli duhet të përdoret vetëm kur është i domosdoshëm, në dozën më të ulët efektive, për kohën më të shkurtër të mundshme dhe sa më rrallë. Gratë shtatzëna këshillohen të konsultohen gjithmonë me mjekun përpara përdorimit të çdo medikamenti gjatë shtatzënisë.

Autoritetet rregullatore në Bashkimin Europian do të vazhdojnë të monitorojnë sigurinë e barnave që përmbajnë paracetamol dhe do të ndërhyjnë menjëherë nëse dalin të dhëna të reja që ndikojnë në sigurinë e tij.

“KORÇA BOOM”