Vd*ekje e parë nga kolla e mirë për vitin 2025, alarm për rënien e vaksinimeve

Një foshnjë në Mbretërinë e Bashkuar ka humbur jetën si pasojë e kollës së mirë, duke shënuar kështu viktimën e parë nga kjo sëmundje për vitin 2025. Sipas raportimeve, fëmija u sëmur dhe ndërroi jetë midis muajve mars dhe qershor, ndërsa mësohet se nëna e tij nuk kishte marrë vaksinën kundër kollës së mirë gjatë shtatzënisë.

Kolla e mirë, e njohur ndryshe si pertusis, është një sëmundje shumë ngjitëse që prek mushkëritë dhe rrugët e frymëmarrjes. Foshnjat përbëjnë grupin më të rrezikuar, dhe për ta pasojat mund të jenë fatale. Ngjarja ndodh vetëm disa javë pasi një tjetër fëmijë humbi jetën nga fruthi në Spitalin e Fëmijëve Alder Hey në Liverpool.

Autoritetet shëndetësore në Britani janë duke ngritur alarmin për rënien shqetësuese të normave të vaksinimit, të cilat kanë arritur nivelet më të ulëta në 15 vitet e fundit. Sipas të dhënave, thuajse një në pesë fëmijë që fillojnë shkollën këtë vit në Angli nuk janë të vaksinuar plotësisht kundër sëmundjeve si kolla e mirë, poliomieliti dhe tetanozi.

Vetëm 83.7% e pesëvjeçarëve kanë marrë të dy dozat e vaksinës MMR (fruthi, shytat dhe rubeola), ndërsa mbulimi me vaksinën përforcuese katërfish, që përfshin poliomielitin, kollën e mirë, tetanozin dhe difterinë, është aktualisht në 81.4%.

Për të rritur mbrojtjen e fëmijëve, autoritetet britanike kanë njoftuar se nga viti i ardhshëm do të nisë vaksinimi rutinë i të gjitha foshnjave kundër lisë së dhenve. Vaksina e re MMRV do të kombinohet me atë ekzistuese për fruthin, shytat dhe rubeolën.

“KORÇA BOOM”